Ný bloggsíða VITA, - Vinir Ítalíu -

Ciao tutti!  Halló allir félagar og velunnarar VITA.  Þessi glænýja bloggsíða félagsins "Vinir Ítalíu"  verður opnuð formlega þann 18. maí 2007 á aðalfundi VITA sem haldinn er í anddyri Borgarbíós á Akureyri. Sá fundarstaður varð fyrir valinu með sérstakri skýrskotun til  hinnar yndislegu ítölsku bíómyndar um "Cinema paradiso" í leikstjórn Giuseppe Tornatore. Myndin "Nuovo Cinema Paradiso" lýsir lífi fólks í smábæ á Ítalíu á fyrri hluta síðustu aldar. Bíóið gegndi stóru hlutverki í lífi fólksins þar sem allir hittust reglulega, ekki bara til að horfa á bíómynd, því þar sló hjarta bæjarins og gleði og sorgir bæjarbúa með öllum sínum tilfinningastraumi leystust úr læðingi í Cinema Paradiso.

   

Félagið VITA, Vinir Ítalíu var stofnað þann 29. apríl 2006 á Akureyri í tengslum við hátíðina "Ítalskt vor - La primavera" sem stóð yfir á Akureyri dagana 29. apríl til 6. maí 2006.  Þessa daga var boðið upp á ýmsa menningartengda atburði, svo sem tónlist, myndlist, fyrirlestra og fleira.

Stjórn VITA fyrsta starfsárið:
Anna Fr. Blöndal (stjórnarformaður)
Ingibjörg Ringsted (ritari)
Elín Margrét Hallgrímsdóttir (gjaldkeri)
Giorgio Baruchello (meðstjórnandi)
Maurizio Tani (meðstjórnandi)